Lidhur me shqetësimet e ngritura ditëve të fundit lidhur me cilësinë e ujit në zonën e fshatit Marec, ekipi i IKSHPK-së, pas një inspektimi, ka identifikuar se resurset e furnizimit të ujit për pije, përbën rrezik potencial për shëndetin e banorëve.
Ministria e Shëndetësisë përmes një komunikate, ka sugjeruar autoritetet përgjegjëse, siç është KK Prishtina dhe KRU “Prishtina” që të ndërmarrin masat e nevojshme për zgjidhje të furnizimit me ujë të sigurt.
“Në favor të kësaj flet edhe mostra e ujit e marrë në familjen Pacolli (furnizohet nga burimi natyror) e cila rezultoi me mungesë të klorit rezidual, me turbullirë të shtuar (mbi 20 NTU) dhe me ngjyrë të ujit të verdhë në të gjelbër. Ky ujë si i tillë nuk është për pije dhe përbën rrezik potencial për shëndetin e banorëve. Po ashtu, edhe rezultati i analizës kimike ka mos përputhshmëri me standardet e paraparë sipas UA nr. 10/2021 ”Cilësia e ujit për konsum nga njeriu”. Rezultatet bakteriologjike priten pas 48 orëve! Duke pasur parasysh rezultatet e analizave laboratorike dhe gjetjet në terren, IKShPK në pajtim me përgjegjësitë e veta ligjore rekomandon autoritetet përgjegjëse – KK Prishtina dhe KRU”Prishtina “ që secila prej tyre në kuadër të kompetencave dhe përgjegjësive të ndërmarrin masa të nevojshme për zgjidhjen afatgjate të furnizimit me ujë të sigurt për banorët e kësaj zone. Problemi bëhet edhe më madhor pasi që situatë e ngjashme është edhe në 21 fshatra tjera të kësaj zone”, kanë shkruar në Facebook.
Ndër të tjerash, IKSHPK ka rekomanduar disa mënyra të furnizimit me ujë, deri në zgjedhjen afatgjate të problemit, raporton teve1.info.
“Deri në zgjedhjen afatëgjate të problemit të furnizimit me ujë, IKSHPK rekomandon banorët që burimet natyrore ekzistuese dhe puset individuale: -të pastrohen mekanikisht nga mbeturinat, të mirëmbahet ( të sanohet kaptazha, rezervuari dhe gypi shpërndarës) – dhe përfundimisht uji të dezinfektohet”, kanë shkruar tutje.
Andaj, IKSHP ka konsideruar që zbatimi i këtyre masave është i domosdoshëm për tejkalimin e problemit aktual të cilësisë së ujit për pije, rrjedhimisht mbrojtjen e shëndetit të popullatës./teve1.info/.
