Gjykata Themelore në Gjilan, e ka dënuar 1 vit mësimdhënësin, Kastriot Kurti, për ngacmim seksual ndaj viktimës Medinë Dauti, e njëherit i është caktuar edhe ndalimi i kontaktit me të, në periudhë tre vjeçare.
Lajmin e ka konfirmuar vetë Dauti, derisa ka shkruar se me këtë vendim, është bërë një hap para për ata persona që kanë përjetuar të njëjtën situatë.
“Ajo që kam kërkuar nga institucionet e drejtësisë tash e një vit ka qenë vetëm liria, drejtësia dhe autonomia. Të lëvizi e lirë e pa u ngacmuar, të më njihet cënimi që më është bërë nga institucionet e drejtësisë, dhe mbrohet e drejta ime për të thënë JO! Sot, Gjykata Themelore në Gjilan i konfirmoi të gjitha këto duke e shpallur fajtor të akuzuarin për ngacmim seksual. Sipas kërkesës sime, Gjykata ia ka shqiptuar të akuzuarit dënimin me kusht me një vit burgim, ndërsa si kusht ia ka caktuar ndalimin e kontaktimit tim në çfarë do forme për periudhën tre vjeçare. Sot, nuk kam fituar vetëm unë, sot është bërë një hap përpara drejt gjykimeve të drejta dhe njohjes së përvojave të personave që përjetojnë ngacmime seksuale. Shpresoj se ky rast do t’i shërbejë institucioneve të drejtësisë si udhërrëfim për trajtimin e rasteve të tilla në të ardhmen”, ka shkruar Dauti në Facebook.
Dauti ka theksuar se rrugëtimi për të arritur deri tek ky vendim, ka qenë mjaft sfidues për të, raporton teve1.info.
“Ndjenjat e pasigurisë, frika e vazhdueshme, cenimi i integritetit tim fizik e seksual, janë vetëm disa nga tmerret e përjetuara. Unë besoj se këtë ditë nuk do e kisha arritur pa përkrahjen e familjes sime, miqve të mi, publikut, e veçanërisht pa përkrahjen e avokates time, Rina Kika. Kjo fitore është një dëshmi e vendosmërisë së palëkundur dhe përkushtimit të saj për drejtësi. Këmbëngulja dhe profesionalizmi i Rinës për lirinë time, kanë qenë thelbësore në krejt këtë rrugëtim”, ka shkruar tutje ajo./teve1.info/.
