Përfaqësues politikë të shqiptarëve në Luginën e Preshevës, kanë dalë me një deklaratë të përbashkët, përmes së cilës po kërkojnë të drejtat e barabarta siç parashihen edhe për serbët në planin evropian.
Por kjo deklaratë nuk është nënshkruar nga kryetari i Preshevës, Shqiprim Arifi.
Ai vlerëson se ky dokument zhvlerëson shumë dokumente të tjera më të rëndësishme të nënshkruara në Luginë të Preshevës dhe që i njëjti, sipas tij, është iniciuar nga partia e Shaip Kamberit, Partia për Veprim Demokratik.
“Është thjesht dokument të cilin partia e Kamberit e ka iniciuar për konsum të brendshëm politik këtu dhe për t’u paraqitur kishe në këto momente të rëndësishëm, sepse unë jam nga ata të cilët me vite tash prej startit të politikës time kam kërkuar që shqiptarët të përfshihen në dialog, në marrëveshje, që shqiptarët të jenë pjesë e zgjidhjes e jo mbetje jashtë kësaj marrëveshje. Dhe këta të cilët kanë nënshkruar kanë fjetur me vite dhe kështu që në këtë kontekst e kanë ndierë vetën borxh hajde ta bëjmë një dokument së paku diçka të kam bërë, e unë se kam ndjerë atë nevojë, sepse ne kemi dokumente shumë më të rëndësishme, dhe unë e kam tha ‘gërklanin’ t’u fol për këtë çështje”, deklaroi ai në një lidhje direkte në “Ditari” në Tëvë 1.
Arifi thotë se ky dokument ka çështje të shumta teknike gabimore, si dhe “qëllimin e ka në drejtim me bë konsum politik të brendshëm në Luginë të Preshevës”.
Deklarata përmban shtatë pika, e cila përveç Arifit, nuk është nënshkruar edhe nga kryetari i LPD-së dhe nënkryetar i Komunës së Bujanocit, Shqiprim Musliu. /Teve1.info/
