Kryeministri i Kosovës, Albin Kurti, u prit në takim nga drejtues dhe deputetë të grupit Europarlamentar “Renew Europe”.
Në këtë takim, Kurti ka falënderuar eurodeputetët dhe grupin e tyre parlamentar, për qëndrimin e tyre pozitiv për liberalizimin e vizave për Kosovën.
Njëherit, pjesë e diskutimit ishte edhe rrugëtimi i Kosovës drejt Bashkimit Evropian dhe Këshillit të Evropës.
“Pas takimit të 10-të të Komitetit të përbashkët Parlamentar për Marrëveshjen e Stabilizim Asocimit, Kryeministri Kurti u prit nga kryesuesi i grupit parlamentar ‘’Renew Europe’’, eurodeputeti Stephane Sejourne, i shoqëruar nga kolegët e tij Ilhan Kyuchyuk, Dragos Tudorache dhe Klemen Groselj. Kryeministri Kurti i falënderoi eurodeputetët dhe grupin e tyre parlamentar për pozicionimin dhe qëndrimin e tyre pozitiv për liberalizimin e vizave për Kosovën, proces i cili presim që së shpejti të finalizohet suksesshëm. Palët diskutuan dhe mbi rrugëtimin drejt Bashkimit Evropian të Republikës së Kosovës dhe aplikimeve për anëtarësim në BE dhe Këshillin e Evropës”, thuhet në komunikatën e Qeverisë.
Më tej thuhet se Kurti i ka njoftuar për reformat e deritanishme dhe rezultatet e arritura përgjatë dy viteve të fundit në vend, raporton teve1.info.
“Vendi ynë vazhdon të shënojë përmirësim në indikatorë ekonomikë e demokratikë, të cilët janë përkthyer në renditjen e Kosovës në mesin e vendeve me përparimin më të lartë të demokracisë në rajon e më gjerë. Sundimi dhe zbatimi i ligjit, luftimi i krimit të organizuar dhe korrupsionit po kontribuojnë në konsolidimin e shtetit të së drejtës, si bazament i drejtësisë, demokracisë e zhvillimit”, thuhet tutje në komunikatë.
Derisa, takimi i tyre u përmbyll duke biseduar mbi procesin e dialogut, propozimin Evropian për normalizim të marrëdhënieve mes Kosovës dhe Serbisë, në takimin e 18 marsit në Ohër./teve1.info/.
