Barazia gjinore në Kosovë është duke u përmirësuar më shpejt se kurrë më parë. Vlerësoi kështu, kryeministri i vendit, Albin Kurti.
Gjatë pjesëmarrjes në edicionin e dhjetë të Javës së Gruas, me temën “Barabarësia: Parakusht për Ripërtëritje të Demokracisë”, Kurti tha se barazia gjinore duhet përqendruar më shumë në zonat urbane, kryesisht në ato vende jashtë Prishtinës.
“Unë besoj që nuk mund të kemi demokraci pa barazi gjinore. Demokracia ndërtohet mbi pluralizmin politik, mbi sundimin e ligjit, mbi të drejtat e njeriut, e pa dyshim edhe me barazi gjinore. Në anën tjetër, nuk mund të kemi barazi shoqërore, pa barazi gjinore. Sa i përket situatës në Kosovës, unë besoj që është duke u përmirësuar dhe përmirësimi është më i shpejtë se kurdo herë më parë. A kemi shumë punë për të bërë?, me siguri që po. Pjesa kryesore ku duhet të përqendrohemi për barazinë gjinore, është në zonat të cilat nuk janë urbane, e sidomos në përgjithësi jashtë Prishtinës”, potencoi Kurti.
Njëherit, Kurti tha se tanimë vërehet edhe një përmirësim i pjesëmarrjes së grave dhe vajzave në sektorin ekonomik, në biznes, në ndërmarrësi, e duke përfshirë këtu edhe pronësinë e grave.
“Nëse shohim institucionet qendrore, mund të thuhet që ka një pjesëmarrje të konsiderueshme të grave dhe vajzave, nëse shohim universitetet tona, vlen sërish e njëjta”, shtoi kryeministri tutje, raporton teve1.info.
Ndër të tjerash, Kurti përmendi edhe tri çështje, të cilat sipas tij, janë shumë të rëndësishme për ecjen përpara sa i përket barazisë gjinore në Kosovë.
“Është kultivimi dhe mirëmbajtja e vatrave të solidariteti gjinor, gratë duhet ta ndihmojnë njëra tjetrën. E dyta është emancipimi shoqëror, me theks te emancipimi i burrave, jemi fokusuar në emancipimin e grave për të drejtat e tyre, mirëpo duhet të emancipohen burrat dhe djemtë në emancipimin e grave dhe vajzave. Ndërsa e treta, duhet një trajtim më i thellë i pasojave të luftës, sepse në një farë mënyre, edhe ne që kemi shpëtuar, nuk kemi shpëtuar”, deklaroi Kurti më tej./teve1.info/.
