Duke diskutuar për dialogun, nënkryetari i Partisë Republikane të Kosovës, Mehmet Prishtina bën të ditur se do të donte një marrëveshje e cila e kushtëzon Serbinë që ta njoh pavarësinë e Kosovës.
Prishtina thotë se marrëveshja e cila po pritet të nënshkruhet më 18 mars, duhet të kalojë dhe të miratohet në Kuvend.
“Personalisht do të doja që të arrihet një marrëveshje finale e cila kushtëzon edhe Serbinë që në mënyrë reciproke ta pranojë shtetësinë e Kosovës, pavarësinë e Kosovës. E që kjo nuk po ndodh dhe nuk përmendet në atë dokument. Kështu që unë mendoj, duke u bazuar, edhe pse shtetet serioze, marrëveshjet paraprake që i bëjnë dhe janë të ratifikume, sipas të drejtës ndërkombëtare janë të obliguara t’i respektojnë. Por një marrëveshje e tillë duhet të kalojë edhe në Kuvend dhe të miratohet në Kuvend”, deklaroi ai në një lidhje direkte në “Info Nata” në Tëvë 1.
Sipas tij, kryeministri Albin Kurti duhet që të mos marrë vendime vetë, por të konsultohet me opozitën.
“Mendoj që kryeministri Kurti duhet të konsultohet me të gjitha grupet paralamentare dhe jo në mënyrë autokrate të merr vendime të veta e të ankohet se po e lënë vetë me marrjen e vendimeve. Pra këtu një duhet një konsultë më e gjerë dhe një mbështetje, por siç e tha edhe parafolësja, znj.Tërmkolli më herët, këtu mungon një dialog mes nesh dhe prandaj jemi në këtë ngërç politik, në këtë fazë që jemi dhe kjo është për keqardhje”, u shpreh Prishtina.
Nënkryetari i Partisë Republikane të Kosovës shtoi se opozita është për t’u dëshiruar, pasi sipas tij e njëjta “nuk bëhet përmes rrjeteve sociale”. /Teve1.info/
