Zëvendëskryeministri, Besnik Bislimi, ka pritur në takim ambasadorin e Republikës së Turqisë, Sabri Tunç Angili.
Përmes një komunikate, bëhet e ditur se palët kanë diskutuar për mundësitë e thellimit të marrëdhënieve bilaterale, e veçanërisht në fushën e ekonomisë.
“Në këtë takim u bisedua për mundësitë e thellimit të marrëdhënieve bilaterale, veçanërisht në ekonomi, ku ekziston potencial madhor në rritjen e bashkëpunimit mes dy vendeve tona. Në takimin e parë zyrtar me ambasadorin e ri të Republikës së Turqisë në Kosovë, Sabri Tunç Angili, zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, i uroi mirëseardhje e suksese ambasadorit në detyrën e tij, duke potencuar marrëdhëniet e shkëlqyera të bashkëpunimit mes Kosovës dhe Turqisë”, thuhet në komunikatë.
Njëherit, Bislimi dhe ambasadori i Turqisë kanë biseduar mbi procesin e dialogut Kosovë-Serbi, derisa kanë theksuar rëndësinë e nevojën për stabilitet, paqe dhe siguri në rajonin e Ballkanit Perëndimor, njofton teve1.info.
“Zëvendëskryeministri Bislimi foli dhe për objektivat strategjike të Kosovës, siç janë anëtarësimi në Këshillin e Evropës, rrugëtimi drejt Bashkimit Evropian, përfundimi i procesit të liberalizimit të vizave dhe aplikimi në Partneritetin për Paqe në NATO”, kanë shkruar tutje.
Ndër të tjerash, ambasadori turk u shpreh falënderues për mikpritjen në Kosovë, derisa theksoi mirënjohjen e thellë për ndihmën dhe solidaritetin e Kosovës ndaj popullit turk, në rastin e tërmetit që goditi Turqinë./teve1.info/.
