Mosfunksionimi i semaforëve në rrugë shpesh herë shkakton bllokim dhe tollovi në komunikacion.
E ka raste edhe kur policët e trafikut mungojnë, atëherë kur semaforët nuk janë në funksion.E gjithë kjo situatë këmbësorëve në Fushë Kosovë po ua vështirëson kalimin nga njëra anë e rrugës në tjetrën.
Situata të tilla të mos funksionimit së semaforëve nuk janë të rralla as në Prishtinë, kjo për shkak të gjendjes së tyre të rënduar.
Ndërkaq çmimi për mirëmbajtjen e tyre nuk është i ulët.
“Kanë një kosto bukur të mirë të mirëmbajtjes edhe të vendosjes. Na nuk kemi ndonjë qendër e cila prodhon semaforë siç janë nëpër rajon. Me semaforë çalojmë bukur shumë, jashtëzakonisht shumë, kur e dimë që krejt Prishtina, ama krejt pa dallim që është kryeqytet nuk ka semaforë me bazë inteligjente. Imagjinoje udhëkryqet kryesorë në Prishtinë nuk kanë semaforë, se kuptojmë hala na punën e komunikacionit dhe semaforëve, as si popullatë as si institucion”, ka thënë Bekim Ahmeti, ekspert i komunikacionit.
Kështu, sipas ekspertit të komunikacionit, Nol Dedaj – po rrezikohet siguria rrugore.
“Për fatin e keq, semaforët nuk e kanë programin e rregulluar mirë sepse brenda ciklit ka pika të konfliktit dhe kjo na tregon se fazat e tyre brenda projektit të vendosjes së semaforëve nuk janë të rregulluar sa i përket aspektit të sigurisë rrugore”, thotë Dedaj
E nga komuna e Prishtinës bëjnë të ditur se menaxhimin e tyre e bëjnë kompanitë vendore.
“Riparimi i semaforëve bie ne domenin e DSHP-se, ndërsa ne e menaxhojmë përmes operatoreve ekonomik (kompani vendore ne bashkëpunim me kompani ndërkombëtare”, thuhet në përgjigjen e komunës.
Semaforët e parë në Prishtinë u vendosën në vitin 1974.
Kronika e realizuar nga gazetarja Albiona Hajdari
