Ministrja e Drejtësisë, Albulena Haxhiu thotë se është hera e parë që Qeveria e Kosovës po merr veprime konkrete për luftimin e dhunës.
Duke i replikuar deputetes, Ganimete Musliu, lidhur me femicidin, Haxhiu theksoi se mendësia e saj e shpërfaq mendësinë e qeverisjes së PDK-së.
“Po në Kosovë ka femicid, por në fakt mendësia jote shpërfaq mendësinë e qeverisjes së PDK-së sikurse edhe qeverisjeve të tjera, sepse asnjë veprim nuk e keni ndërmarrë asnjëherë për ta adresuar dhunën në familje, dhunën në baza gjinore, dhunën ndaj grave. Dhe është hera e parë që Qeveria e Kosovës po e adreson seriozisht duke marrë veprime konkrete për luftimin e këtyre dukurive, po është e vërtetë sipas ligjit gëzojnë të drejtën e pronës, trashëgimisë, punësimit, por në praktikë vetëm 14% e grave janë pjesë aktive e tregut të punës”, deklaroi Haxhiu në Kuvend.
Ministrja Haxhiu potencoi se “Qeveria po bën përkushtim maksimal, së pari për të pavarësuar ekonomikisht vajzat dhe gratë në Kosovë, sepse për shkak të mungesës së pavarësisë ekonomike, vajzat dhe gratë ka raste dhe kur e durojnë dhunën sepse s’kanë kah t’ia mbajnë”.
Deklarimi i saj erdhi pas debatit të deputetes Musliu dhe asaj të VV-së, Arjeta Fejza, lidhur me atë nëse ka femicid në Kosovë apo jo.
Deputetja Fejza tha se në Kosovë ka femicid, ndërsa Musliu kundërshtoi atë, teksa deklaroi se shoqëria kosovare është demokratike.
“Ne duhet të punojmë shumë që të zbatohet Ligjet në Kosovës të cilët ofrojnë të drejta për gratë. Nuk ka femicid në Kosovë, shoqëria kosovare është demokratike, nuk jemi as Afganistan as Iran. I dënojë çdo vrasje qofshin të grave apo edhe të burrave”, tha Musliu. /Teve1.info/