Në Ditën Ndërkombëtare të Gruas kryetari i PDK-së, Memli Krasniqi ka takuar koleget e partisë së tij të cilat kanë pozicione udhëheqëse, deputetet, anëtaret e Kryesisë, Kryesueset e Kuvendeve Komunale dhe Nënkryetaret e Komunave.
Krasniqi në Facebook ka thënë se i ka falënderuar për angazhimin dhe shembullin që japin në fuqizimin e rolit të gruas në shoqëri.
I pari i PDK-së, tha se megjithëse kjo është një ditë kushtuar festimit të arritjeve sociale, ekonomike, kulturore dhe politike të grave, sipas tij, është edhe një përkujtim se misioni për barazi gjinore nuk ka mbaruar dhe kërkon ende shumë punë për t’u bërë.
“Përkundër përpjekjeve të vazhdueshme, gratë në Kosovë ballafaqohen akoma me sfida dhe vështirësi nga më të ndryshmet, për të cilat është tejet e rëndësishme që të vazhdojmë t’i mbështesim.Pikërisht për këto arsye, jam tejet i lumtur dhe krenar që si Kryetari i Partisë Demokratike të Kosovës, për herë të parë në Kosovë dhe rajon, kemi marrë vendimin për të zbatuar barazi të plotë gjinore, 50/50, në të gjitha nivelet e udhëheqjes dhe vendimmarrjes në parti”, tha ai.
Tutje ai tha se inkurajimi i pjesëmarrjes së grave në politikë dhe në udhëheqje është thelbësor për fuqizimin e rolit të gruas dhe barazisë gjinore
“Inkurajimi i pjesëmarrjes së grave në politikë dhe në udhëheqje është thelbësor për fuqizimin e rolit të gruas dhe barazisë gjinore. Kur gratë kanë përfaqësim të barabartë në udhëheqje, zëri i tyre dëgjohet më shumë dhe nevojat e tyre adresohen. Përmes këtij vizioni, ne do të përkushtohemi që të krijojmë politika dhe veprime më të mira që promovojnë dhe avancojnë të drejtat e grave.Vetëm duke fuqizuar gratë përmes arsimit, kujdesit shëndetësor, mundësive ekonomike, ndryshimit të qëndrimeve shoqërore dhe promovimit të lidershipit politik dhe ekonomik, gratë mund të përmbushin potencialin e tyre të plotë dhe të shtojnë ndikim e madh pozitiv që mund ta kenë për shoqërinë dhe shtetin”, tha Krasniqi.
Teksa shtoi se ka ende shumë punë për t’u bërë por siç tha ai, jemi të vendosur që këtë punë ta bëjmë së bashku.
