Ambasadori i Shteteve të Bashkuara të Amerikës, Christopher Hill ka folur sërish për dialogun Kosovë-Serbi.
Duke folur për çështjen e Asociacionit, Hill ka thënë se shumë njerëz po e shohin këtë si test për bashkësinë ndërkombëtare nëse ajo është vërtet e interesuar për themelimin e tij.
“Unë mendoj se [v.j dialogu] po shkon në drejtimin e duhur, por duhet të presim dhe të shohim sepse askush nuk ka rënë dakord për asgjë ende. Nuk do të doja të flas për çështje konkrete dhe afate, mendoj se është e rëndësishme që çështjet të zgjidhen, që pas 10 vitesh përfundimisht të formohet Asociacioni i Komunave Serbe dhe që shumë njerëz e shohin këtë si një test nëse bashkësia ndërkombëtare është seriozisht i interesuar për ta zgjidhur këtë çështje dhe mund të them se është. Na duhet vetëm durim”, ka thënë Hill për Radio Sto Plus të Novi Pazarit.
Hill tutje ka shtuar se Serbia po paguan çmim të lartë për vendimin që të mos i vendosë sanksione Moskës, transmeton teve1.info.
“Duhet të dimë se Rusia sulmoi brutalisht fqinjin e saj, shumë vende të vogla evropiane vendosën sanksione, megjithëse ishte e vështirë për ta, por e bënë sepse ishte e drejtë. Besoj gjithashtu se Serbia do ta kuptojë këtë, nuk është kurrë vonë për të bërë gjënë e duhur”, tha Hill.
I pyetur se çfarë e ngadalëson më shumë përparimin e Serbisë drejt BE-së – mos vendosja e sanksioneve kundër Moskës, progresi i pamjaftueshëm në dialogun me Prishtinën, gjendja e demokracisë apo problemet brenda vetë BE-së, ambasadori Hill tha se përgjigja më e sinqertë do të ishte “të gjithë bashkë”.
