Anëtari i Kryesisë së Lëvizjes Vetëvendosje, Arbër Zaimi është shprehur skeptik se Serbia në krye me Aleksandar Vuçiqin do ta pranojë planin evropian.
Zaimi në Tëvë1, tha se palët në takimin e mbajtur në Bruksel kanë dhënë një konsensus verbal mbi platformën e propozuar, mirëpo sipas tij, ky konsensus nuk është i fuqishëm derisa nuk është i nënshkruar.
“Palët kanë dhënë një konsensus verbal mbi platformën e propozuar, mirëpo ky konsensus nuk është i fuqishëm, pra nuk ka vlerë juridike për aq kohë sa nuk është nënshkrim pra firmë e kësaj marrëveshje”, tha ai.
“Analizat janë të ndryshme mirëpo realisht plani i propozuar franko-gjerman i ka disa pika të cilat me gjasë janë shumë të vështira për Serbinë e sotme dhe për presidentin serb Aleksandar Vuçiq që ta nënshkruajë këtë plan franko-gjerman. Sidomos e kam fjalën për nenin 2, nenin 3 dhe 4 të kësaj platforme, të cilat le të themi se janë hapa shumë të vështirë për t’i pranuar kjo Serbi e sotme. Ndoshta një Serbi më demokratike, më liberale në frymë mund ta pranonte, por është vështirë ta shoh këtë Serbi me këtë përbërje të deputetëve dhe qeverisë që ka ta pranojë”, tha ai në emisionin “Info Nata”./teve1.info./