Analisti, Arton Demhasaj, e ka cilësuar si të rrezikshme tendencën për unifikim të kompetencave të komunitetit serb në Kosovë, në një trup të vetëm që sipas tij, quhet Asociacion.
Madje sipas Demhasajt, komuniteti serb ka më së shumti kompetenca krahasuar me secilin shtet në Bashkimin Evropian.
“Ne e shohim në Maqedoni kur rreth 25 ose 26 për qind janë shqiptarë atje edhe sa vështirësi kanë ata për të realizuar të drejtën e tyre të gjuhës. Unë pajtohem me atë që nuk e gjen në Bashkimin Evropian as një shtet që komuniteteve në tërësi u jep më shumë kompetenca sesa ju jep Kushtetuta e Kosovës, këtu pajtohna, prandaj tendenca për me shku drejt Asociacionit kur komunitetit ja ke jep të gjitha të drejtat që mund t’i kenë në botën demokratike në Kushtetutën tonë e që i kanë edhe me ligje të përcaktuar…”, tha ai.
Tutje Demhasaj në emisionin “Këndi i Debatit” tha se as Kushtetuta e Republikës së Kosovës, dhe as një Ligj nuk mund të ndryshohet pa pasur edhe miratimin e deputetëve serb në Kuvend.
“Pastaj ku po don më shumë të drejtë që 5 për qind e një komuniteti ka 10 deputetë në Kuvend dhe nuk mundesh as me ndryshu Kushtetutën dhe as me ndrru ligje që quhen me interes vital pa e marrë edhe shumicën e tyre. Pra kanë kompetenca, esenca është që ato kompetenca që i kanë janë shpeshherë kompetenca bllokuese. Unë e shoh të rrezikshme që ato kompetenca pastaj me i unifiku në një trup të vetëm që mund të quhet Asocioacion apo union i komunave, pra komunat serbe kanë kompetenca ekzekutive”, tha ai./teve1.info./
