Kryetari i Partisë për Liri dhe Drejtësi (SSP), Dragan Gjilas, thotë se Serbia duhet të jetë ekonomikisht më e fortë dhe më me ndikim politik “në mënyrë që të mund të mbrojë popullin e saj në Kosovë dhe Metohi dhe se kjo nuk është e mundur nëse është në konfrontim me Evropën dhe Perëndimin”.
“Partia e Lirisë dhe e Drejtësisë nuk mori pjesë në negociata në asnjë mënyrë, propozimet tona me qëllime të mira nuk u pranuan dhe të gjithë përgjegjësinë për tekstin e keq të marrëveshjes e mban qeveria. Në anën tjetër, për këdo që ka qëllime të mira është e qartë se refuzimi i Marrëveshjes tashmë të pranuar, e cila nuk është e mirë për Serbinë, nuk do të ishte mirë për Serbinë”, theksoi Gjilas për TV Nova.
Ai tutje tha se “ekstremistët që avokojnë për kthimin paqësor të Kosovës dhe Metohisë në rendin kushtetues të Serbisë, po mashtrojnë opinionin, sepse shqiptarët nuk duan të jetojnë në Serbi dhe ky është realiteti”.
“Do të ishte e drejtë që atëherë ata ekstremistë të thonë qartë se janë të gatshëm për konflikte dhe luftëra të reja, për vetizolim dhe varfërim të mëtejshëm të Serbisë”, tha Gjilas, transmeton teve1.info.
Ai beson se Serbia, në vend që të hyjë në konflikte të reja dhe në izolim, duhet të sigurojë një jetë më të mirë dhe një të ardhme paqësore për ata që kanë mbetur në Kosovë.
“Në të njëjtën kohë, shteti duhet të ndihmojë në hapjen e fabrikave në pjesët e Kosovës ku jetojnë serbët, në mënyrë që njerëzit të gjejnë punë dhe të marrin paga të mira. Shteti duhet të investojë para për zhvillimin e Universitetit të Mitrovicës, në mënyrë që në atë universitet të studiojnë sa më shumë të rinj”, shtoi ai.
