Mehmet Yayar, iniciator i ndërtimit të shtatores së komandantit, Adem Jashari në Sivas të Turqisë foli për idenë e këtij projekti.
Yayar tregoi se kanë mbledhur të gjitha shoqatat dhe disa biznesmenë që e duan Kosovën, për të ndihmuar në realizimin e kësaj shtatoreje.
“Qyteti nga vi unë në Turqi, është një qytet me shumë kulturë, i cili i do trimat dhe ata njerëz që japin për vendin e tyre. Në atë qytet nuk ka asnjë shqiptar. I kemi grumbulluar të gjitha shoqatat me ideologji të ndryshme për këtë projekt. I kemi ftuar të gjithë biznesmenët që e duan Kosovën, ka qenë ambasadori i Kosovës na Ankara, Avni Spahiu. Ai ka qenë mysafir i yni kur kemi filluar këtë projekt. Për ne, qëndrimi i shtatores të Adem Jasharit aty, e shohim si mysafir i yni në Turqi, por edhe si të jetë qytetar i Sivasit. Shtatoren e kemi bërë në vendin më të mirë që e meriton, është brenda kampusit të Universitetit të Sivasit, universitet i cili numron mbi 5 mijë studentë”, rrëfeu Yayar në emisionin “Ditari”.
Njëherit, Yayar tregoi se që nga momenti kur ka parë gjendjen e Kosovës pas luftës, ka lënë familjen e tij në Turqi për t’u zhvendosur në Kosovë.
“Për herë të parë, në Kosovë kam ardhur në vitin 2004, kanë qenë vitet e para pas luftës ku Kosova është ballafaquar me vështirësitë e saj të rimëkëmbjes. Kur i kam parë vuajtjet e Kosovës, e kam lënë familjen dhe pasurinë atje dhe kam filluar jetesën këtu. Po ashtu, këtu e kam gjetur qetësinë shpirtërore”, tha tutje ai në Tëvë1.
Më tej, Yayar tha se në vitin 2004 kur ka ardhur për herë të parë në Kosovë, ka vizituar të gjitha varrezat e dëshmorëve, e veçanërisht Prekazin.
“Në 2004 kur kam ardhur në Kosovë i kam vizituar të gjitha varrezat e dëshmorëve. Me atë vizitë, për fund e kam lënë Prekazin, shtëpinë e Adem Jasharit. Kur kam shkuar atje dhe e kap parë atë gjendje, jam emocionuar shumë dhe kam menduar me vete që kjo gjendje ka mundur të jetë edhe në Turqi, kjo familje ka mundur të jetë edhe familja ime”, tha ai./teve1.info/.