Nënkryetari i Lidhjes Demokratike të Kosovës, Lutfi Haziri, për planin e veprimit nga propozimi evropian thotë që problemi është se a do të ketë vullnet për t’u zbatuar nga të dyja palët, nga Kosova dhe nga Serbia.
Haziri thotë që nuk është problemi i funksionimit të organeve të trupit të zbatimit, por te vullneti për të zbatuar marrëveshjen.
“Nuk është problemi i funksionimit të organeve të trupave i zbatimit, problemi është që a do të ketë vullnet për t’u zbatuar. Palët a marrin vendim të zbatohet apo me të bëjnë obstruksione prapë, krejt kjo është ajo që tash e kemi mjegull. Edhe liderët e mëdhenj që marrin obligimet edhe nxjerrin në emër të popullit vendime të tilla të vështira ecin para e shtyjnë procesin para, sepse nuk ka asnjë arsye Kosova karshi partnerëve ndërkombëtarë të bëhet e pabesueshme. Përkundrazi Kosova duhet me ruajt besueshmërinë me partnerët tonë dhe duhet me ec para në procese”, tha Haziri në emisionin “ResPublika” në Tëvë1.
Nënkryetari i LDK-së, tha plani implementues është plan teknik.
“Ajo që na shohim problem të pariparueshëm që e ka shkaktuar kjo qeveri dhe ky kryeministër nuk ka rrugë për riparim në këtë fazë, sepse plani implementues është plan teknik, i cili do të bëjë trupa të përbashkët. Qeveria e Kosovës duhet të bëjë grupin punues për draftimin e statusit të Asociacionit, ai draft-status duhet të dërgohet në Gjykatën Kushtetuese sipas marrëveshjes së 2015-tës, por jo sipas marrëveshjes së fundit”, tha ai.
Haziri është skeptik se a do të nënshkruhet pjesa bazë e dokumentit nga të dyja palët, pasi që sipas tij mund të nënshkruhet vetëm pjesa teknike.
“Në pjesën teknike, të shohim se sa po arrihet të dakordohen palët, ndoshta arrijnë ta nënshkruajn pjesën teknike e mos ta nënshkruajn pjesën bazë të dokumentit, por do të jetë kontradiktore mandej”, tha ai.
Ai sheh një tendencë nga pushteti që është duke ikur nga institucionet vendimmarrëse.
“Por, po shihet një tendencë me i ik institucioneve vendimmarrëse, siç është Kuvendi i Republikës”m shtoi Haziri.
