Kryetari i Lidhjes Demokratike të Kosovës, Lumir Abdixhiku ka thënë se sakrifica e familje Jashari ishte zgjim për fatin e vendit.
Ai në seancën solemne të Kuvendit të Kosovës në shënim të 25 vjetorit të Epopesë së UÇK-së, tha se kjo është ngjarja e vetme që ofron dhimbjen dhe krenarinë në të njëjtën kohë.
“Qëndresa e tyre ishte zgjim i përbrendshëm për fatin tonë të shkruar tashmë më nga një sakrificë që s’mund të kapërcehej asnjëherë. Në historinë e popullit të Kosovës nuk ka asnjë ngjare që arrin të gërshetojë dhembshurinë dhe krenarinë në të njëjtën kohë”, ka thënë Abdixhiku.
Ai ka thënë se thirrja e familjes Jashari na vije edhe sot, si përkujtim për të punuar së bashku për vendin.
“Ajo na vije si rikujtim i përditshëm i obligimit tonë për vendin barrën e trashëguar nga të tjerët para nesh e trashëgiminë e domosdoshme që duhet ta lëmë tek të tjerët. Ajo na vije si thirrje për bashkim të brendshëm, për dashur të pashtershme e për angazhim të mbarë e të drejtë në çdo veprim tonin”, tha ai.
