Zëvendëskryeministri Besnik Bislimi vlerëson se tani është momentumi i duhur që Greqia ta njohë pavarësinë e Kosovës. Kjo pasi që sipas tij, tash edhe Serbia është angazhuar praktikisht ta bëjë një gjë të tillë.
Këto komente Bislimi i bëri për një gazetë greke, teksa po qëndron për vizitë zyrtare në shtetin Helen.
Sipas Bislimit rasti i Kosovës nuk ka të bëjë absolutisht me Qipron, pasi sipas tij Kosova është njohur nga shumica e anëtarëve të Kombeve të Bashkuara.
“Është në interesin e Qipros që të bëjë sa më shumë që të jetë e mundur për të shmangur këto paralele”, thekson ai për “Kathimerini”.
Bislimi ka shtuar se në përgjithësi 5 shtetet mosnjohëse duhet “të rishikojnë pozicionin e tyre dhe të na mbështesin më tej në drejtim të forcimit të institucioneve tona, por edhe arritjes së konvergjencës për kriteret evropiane.”
Ai tutje ka shtuar se pret që asnjë vend të mos e bllokojë anëtarësimin e Kosovës në organizata ndërkombëtare.
“…Pasi për këtë është dakorduar edhe Serbia”, ka deklaruar ai.