Organizata për Rritjen e Cilësisë në Arsim (ORCA), të enjten ka mbajtur një aksion simbolik, sikur thuhet, për të demaskuar përpjekjet e dyshimta të deputetit të Lëvizjes Vetëvendosje, Ardian Gola në ndërhyrjet që ai është munduar t’i bëjë në Ligjin për Agjencinë e Kosovës për Akreditim.
Sipas tyre, edhe ministrja e Arsimit, Arbërie Nagavci, është e përfshirë në këtë “skandal”.
Dibran Hoxha nga kjo organizatë, ka thënë në një adresim për media, se me iniciativë të Ardian Gola, i cili është kryetar i Komisionit për Arsimit, Shkencë, Teknologji, Inovacion, Kulturё, Rini dhe Sport, u propozuan disa ndryshime të fundit të cilat e degjenerojnë ligjin në tërësi
“Tendencat e vazhdueshme të deputetit Ardian Gola mbeten të paqarta për ORCA-n, por të dyshimta gjithsesi. Në fillim i njëjti pat lobuar aktivisht për dobësimin e Këshillit Shtetëror të Cilësisë që shërben si bord i agjencisë, duke provuar që kompetencat për akreditim t’ia delegojë komisionit të ankesave, çka u kundërshtua në një takim publik me Komisionin nga vet Presidenti i EQAR-it, institucion ky prej të cilit Kosova ishte përjashtuar për shkak të ndërhyrjeve politike”, u shpreh ai.
“Pasi dështoi kjo tentativë që ORCA e sheh si të fitimprurëse për sektorin privat të arsimit të lartë, deputeti Gola ka bërë ndërhyrje në draftin origjinal të projektligjit duke ndryshuar nenet që lidhen me akreditimin krahas nivelit të studimeve, gradës shkencore dhe publikimeve shkencore që duhet t’i kenë bartësit e programeve në proces të akreditimit”, tha tutje ai
“Përmes këtyre ndërhyrjeve synon t’i fiksojë dhe betonizojë standardet e akreditimit të cilat përcaktohen ekskluzivisht nga manualet e akreditimit që i nxjerrë Agjencia e Akreditimit, që burojnë nga standardet evropiane të përcaktuara nga ENQA dhe EQAR (standardet ESG). Përcaktimi i tyre në ligj e bën të pamundshëm avancimin e tyre në të ardhmen, çka është detyrim për Agjencinë kur të bëhet anëtare me të drejta të plota në ENQA dhe EQAR. Rrjedhimisht, tentativa për fiksim të standardeve është edhe pengim i avancimit të Agjencisë në rrugëtimin e saj drejt anëtarësimit të plotë në ENQA dhe EQAR si dhe përpjekjeve për cilësi në Arsimin e Lartë në Kosovë”, u shpreh Hoxha./eo
