Deputetja e Partisë Demokratike të Kosovës, Ariana Musliu-Shoshi, tha se zëvendëskryeministri, Besnik Bislimi, s’ka pasur fare ide se çfarë përmban plani evropian.
Madje, ajo tha se nuk është e vërtetë që kryeministri, Albin Kurti e ka ndarë këtë plan me liderët opozitarë.
“Ky plan është një plan të cilin nuk e kanë parë as liderët opozitarë edhe pse Kurti ka thënë që e ka ndarë me ta. Mirëpo, nuk e ka ndarë në formë të shkruar. E dimë që nga shtatori, në bazë të asaj që ka deklaruar Kurti, ky plan ka ndryshuar shumë e shumë derisa është dorëzuar me datën 22 dhjetor në Qeveri dhe nga ajo datë nuk e kemi parë askush. Jam shumë e bindur që as zëvendëskryeministri Besnik Bislimi, s’ka pasur ide se çfarë përmban ky plan, përveç kryeministrit Kurti”, deklaroi Musliu-Shoshi në emisionin “Info Nata”.
Njëherit, Musliu-Shoshi pretendoi që edhe vetë deputetët e Lëvizjes Vetëvendosje nuk janë të informuar për çfarë dialogon Kurti, përcjell teve1.info.
“Pra, ka pasur një mbyllje hermetike nga kryeministri Kurti. Po ashtu edhe deputetët e Lëvizjes Vetëvendosje nuk e kanë pasur idenë se çfarë po flitet. Shihet që ka një storje të qëndrimeve edhe për brenda Vetëvendosjes, sepse as deputetët e tij nuk janë të informuar se për çfarë po dialogun Kurti”, theksoi tutje ajo në emisionin “Info Nata”.
Më tej, Musliu-Shoshi tha se në qoftë se kjo marrëveshje është ndërkombëtare, atëherë duhet patjetër të sillet në Kuvendin e Kosovës./teve1.info/.
