Po e marrin për trajtim një rast emergjent.
Kështu është përditshmëria e punës së tyre në Qendrën Klinike Universitare të Kosovës.
Çdo ditë, stafi mjekësor emergjent ballafaqohet me rastet nga më të rëndat.
Andaj po vlerësohet se atyre u duhet edhe mbështetje psikologjike, mirëpo sipas anesteziologut në mjekësinë intensive, Mentor Alimusaj deri më tash nuk është bërë asgjë në këtë drejtim.
“Stafi që punojnë në ekipin intensiv është më i rënduari në gjithë SHSKUK-në. Normal që kanë nevojë për mbështetje. Për këtë duhet të përkujdeset me siguri menaxhmenti në të ardhmen, megjithatë deri më tash nuk është bërë diçka e tillë por prap se prap stafi në mjekimin intensiv është më i ngarkuari në të gjithë SHSKUK-në”, bën të ditur Alimusaj.
Se është nevojë emergjente për përfshirjen e psikologëve për stafin në QKUK, e thotë edhe psikologu Leotrim Edipi.
“Konsideroj që ekziston një nevojë imediate që me u përfshi edhe psikologët të cilët kishin me kontribu me mbështetje psiko-sociale stafit të cilët janë të angazhuar në QKUK, në këtë rast për shembull mjekët për shkak të natyrshmërisë dhe rrjedhshmërisë së punës, që kjo kish me e rritë produktivitetin edhe njëkohësisht mirëqenies psikologjike të punëtorëve të angazhuar”, theksoi Edipi.
Ndërkaq gazetari i shëndetësisë, Bujar Vitja, thotë se ka mungesë të psikologëve edhe për pacientët në QKUK.
“Do të duhej të kishte më tepër. Aq më tepër duke pasë parasysh ndikimin e pandemisë në shëndetin mendor dhe ato që pritet të jenë pasojat e stresit post-traumatik, në vendin tonë nuk është që janë trajtu prej institucioneve, andaj do të duhej të kishte psikologë klinik në të gjitha klinikat e QKUK-së”, deklaroi ai.
Në Qendrën Klinike Universitare të Kosovës janë mbi tridhjetë klinika në shërbim të pacientëve.
Kronika e realizuar nga gazetarja Albiona Hajdari.