Profesori universitar, Arben Fetoshi duke komentuar takimin e sotëm të kryeministrit të Kosovës, Albin Kurti dhe presidentit serb, Aleksandar Vuçiq, ka thënë se ky dialog tashmë ka hyrë në kapitullin e fundit.
Mirëpo sipas Fetoshit për përmbylljen finale të këtyre diskutimeve nevojitet ndihmë nga partnerët ndërkombëtarë për zbatimin e marrëveshjeve.
“Dialogu midis Kosovës dhe Serbisë ka hyrë në kapitullin e fundit veçse duhet pak ndihmë më të madhe të partnerëve ndërkombëtarë sa i përket aranzhimeve për zbatimin e kësaj marrëveshje, aranzhimeve edhe kohore edhe tematike, duke pasë parasyshë një prej temave më të ndjeshme në Kosovë që lidhet me Asociacionin e Komunave me shumicë serbe”, ka thënë ai.
Tutje Fetoshi në emisionin “Këndi i Debatit”, theksoi se çështja e Asociacionit është sfida më e madhe e kryeministrit Kurti, madje sipas tij, kjo do të jetë edhe sfidë edhe për Kosovën.
“Natyrisht kjo është sfida më e madhe për kryeministrin Kurti dhe natyrisht do të jetë sfidë edhe për Kosovën në kuptimin e Asociacionit çfarë ai do të jetë, si do të dizajnohet dhe se sa kujdesshëm do të mund të plotësohet me instrumentet dhe parime që e zbusin sa më shumë atë në kuptimin e një forumi, i cili do t’i shërbente shqetësimeve të komunitetit serb në Kosovë, apo një entiteti që mund të përbëj rrezik permanent për funksionlitetin e Republikës së Kosovës”, shtoi Fetoshi.
Ndryshe Shefi i diplomacisë evropiane, Josep Borrell pas takimit në Bruksel tha se palët u morrën vesh që nuk ka nevojë për diskutime të tjera rreth propozimit evropian. Megjithatë Borrell tha se duhen negociata tjera për t’i gjetur modalitetet e zbatimit të saj dhe për këtë do të ketë takim tjetër në mars./teve1.info./