Deputeti shqiptar në Parlamentin e Serbisë, Shaip Kamberi, ka njoftuar se është kërcënuar me jetë nga një person i panjohur në rrjetin social Facebook.
Andaj, Kamberi ka shkruar se kjo është atmosfera në të cilët jetojnë dhe veprojnë shqiptarët në Serbi, derisa ka theksuar se kjo është njëra nga arsyet e kërkesës për zgjidhje simetrike të të drejtave të komuniteteve.
“Sot, përmes rrjetit social Facebook, nga një person i panjohur kam pranuar kërcënime të drejtpërdrejt për jetën time. Mjaft me rrëmbime, ndërsa sa të përket ty personalisht, ruaje gjithmonë shpinën kur të shkosh dikund. Nuk do të kuptosh asnjëherë kur do të vij për kokën tënde“ është teksti i mesazhit që kam marrë, përmes messenger, nga personi Danijell Millkoviq”. Kjo është atmosfera në të cilën punojnë, veprojnë dhe jetojnë shqiptarët, në Serbinë autoritare të Aleksandar Vuçiqit. Kjo atmosferë diskriminuese e kërcënuese është arsyeja kryesore e kërkesës tonë për zgjidhje simetrike të të drejtave të komuniteteve”, ka shkruar Kamberi në Facebook.
Gjithashtu, Kamberi ka shkruar se për disa muaj me radhë, Serbia po mundohet ta ndërtojë një realitet virtual të gjoja rrezikimit të jetës së serbëve në Kosovë, raporton teve1.info.
“Ndërkohë, sa është e rrezikuar liria dhe jeta e shqiptarëve në Serbi flasin rastet e shumta të diskriminimit. Dënimi i para disa ditëve i kryetarit të Këshillit Kombëtar, Ragmi Mustafi, për përdorimin e flamurit kombëtar shqiptar me 28 nëntor të vitit të kaluar, paraqet vetëm një nga rastet e këtilla”, thuhet tutje në postimin e tij.
Derisa e ka përmbyllur duke thënë se pavarësisht se të tjerëve nuk u pëlqen, do e thonë gjithmonë vetëm të vërtetën./teve1.info/.
