Kryetari i Kuvendit të Kosovës, Glauk Konjufca, tha se 15-vjetori i Pavarësisë së Kosovës, është pika më e lartë e deritanishme e përpjekjes së Kosovës për shtetësi.
Në senacën solemne të Kuvendit, Konjufca shfrytëzoi rastin t’i falënderojë të gjithë ata që luftuan e kontribuuan për lirinë e popullit, derisa shtoi se do e ruajnë me çdo kusht Republikën e Kosovës si më të vlefshmen që kanë.
“Sot është ditë feste, dita e pavarësisë, shteti ynë i mbushi 15 vjet. Ky moment na bashkon të gjithëve, sepse është pika e lartë e deritanishme e përpjekjes tonë për shtetësi. Prandaj, së pari iu përkulemi atyre që dhanë më së shumti. Dëshmorëve tanë të pavdekshëm që nuk e kursyen as jetën e tyre për lirinë e popullit tonë. I kujtojmë e i nderojmë në këtë ditë të rëndësishme, martirët tanë të ndritur, që u flijuan ashtu që ne të tjerët të mund të jetojmë. Nuk i harrojmë të pagjeturit që na mungojnë, gratë e burrat që u dhunuan e u torturuan. Nuk i harrojmë e falënderojmë, së bashku të gjithë ata që mbajtën për lirinë tonë me mijëra vite burgje, ashtu që fëmijët tanë të rriten të lirë në tokën e atdheut tonë të çmuar. Por, mbi të gjitha u përkulemi popullit tonë për qëndresën e tij shekullore e cila na frymëzon çdo njërin nga ne. Do ta ruajmë Republikën tonë si më të vlefshmen që kemi, do ta zhvillojmë vendin tonë të përbashkuar rreth këtij qëllimi”, deklaroi Konjufca në Kuvend.
Njëherit, Konjufca shprehu mirënjohje edhe për miqtë e Kosovës që ndihmuan për pavarësinë dhe lirinë e popullit, raporton teve1.info.
“Gjithçka që arritëm nuk do të kishte qenë e mundshme pa ndihmën e tyre. Por, kur nuk do ta harrojmë gjenocidin që bëri Serbia mbi qytetarët tanë, mbi fëmijët e gratë, e pleqtë”, shtoi tutje Konjufca
Më tej, Konjufca tha se Kosova është një shtet i ri, mirëpo me rrënjë të moçme.
“Këto rrënjë na mbajnë të lidhur e të bashkuar fortë. Kështu ecëm për gjatë historisë e cila për popullin tonë ishte e mbushur me rreziqe, kthesa dhe udhëkryqe. Trungu ynë i lirisë u ujit me gjakun e luftëtarëve të Ushtrisë Çlirimtare të Kosovës, e cila zhvilloi luftë të drejtë dhe luftë mbrojtëse”.
Ndërkaq në përmbyllje të fjalimit, Konjufca uroi 17 shkurtin duke thënë rrnoftë Republika e Kosovës./teve1.info/.
