Kryetari i komunës së Prishtinës, Përparim Rama, në 15-vjetorin e Pavarësisë së Kosovës, tha se kjo është dita më e veçantë e vitit për popullin e Kosovës.
Gjatë seancës solemne të Kuvendit Komunal, Rama theksoi se sot është një ditë e qëlluar për ta kujtuar edhe kontributin e jashtëzakonshëm të asaj kohe, Ibrahim Rugovës.
“Sot është dita më e veçantë e vitit për popullin e Kosovës, sepse festojmë përvjetorin e shpalljes së Pavarësisë, si shtet i pavarur. Të gjithë ne në ato kohëra i përballnim traumat e robërisë në të cilën u rritëm me shpresat dhe ëndrrat për të ardhmen. Ne i përjetuam edhe dhimbjet e paraardhësve tanë, që gjithë jetën e shkuan nën sundimin jugosllav. Por, për dallim prej tyre, ne si brez ia dolëm ta jetësojmë ëndrrën shekullore dhe realitetin e saj. Pra, ta jetojmë Kosovën e lirë. E institucionalizuam përpjekjen tonë me themelimin e Lidhjes Demokratike të Kosovës, e drejtuar nga doktor Ibrahim Rugova, u bë strumbullar i bashkësisë tonë dhe forca kryesore politike gjatë viteve të 90-ta, ku zyrtarisht ishim ende krahinat rome të Jugosllavisë. Prandaj, sot në 15-vjetorin e Pavarësisë së Kosovës, është një ditë e qëlluar për ta kujtuar edhe kontributin e jashtëzakontë të liderit tonë të kohëve më të vështira, doktor Ibrahim Rugovës, që me të drejtë brezat e rinj do ta njohin si presidenti historik i Kosovës”, deklaroi Rama para medieve.
Njëherit, Rama vlerësoi se për shumë vite, populli i Kosovës ka treguar rezistencë individuale e kolektive. E kjo sipas tij, është shprehur më së miri në fushën e arsimit, mjekësisë, në arte e sporte, përcjell teve1.info.
“Ja kemi hapur dyert njëri tjetrit duke krijuar shpirtin e përbashkësisë, shpresën për një të ardhme më të mirë, e kjo na është kthyer në pjesë të pandashme, të asaj që jemi sot. Në atë kohë të vështirë ne pulsonim si një, frymonim si një, ishim një! ”, tha tutje Rama.
Derisa sot, në Prekaz kanë bërë homazhe edhe përfaqësues të institucioneve qendrore dhe lokale të Kosovës, përfaqësues të shoqatave të dala nga lufta e UÇK-së, si dhe qytetarë të shumtë./teve1.info/.
