Me rastin e 15-vjetorit të pavarësisë, Presidenti i Shqipërisë, Bajram Begaj, e ka filluar vizitën zyrtare në Kosovë ku u prit nga presidentja e Kosovës, Vjosa Osmani, me ceremoni shtetërore.
Pas kësaj vizite, Begaj ka shkruar se në këto 15 vite Pavarësi, Kosova ka demonstruar në mënyrë shembullore vlerat shekullore të kombit shqiptar.
“Kënaqësi e veçantë të jem në Prishtinë me rastin e 15 vjetorit të Pavarësisë. Urova në emër të të gjithë shqiptarëve Presidenten e Kosovës, Vjosa Osmani-Sadriu, për këtë përvjetor kaq të rëndësishëm. 15 vite janë shumë pak për një komb, e për më tepër për një komb të lashtë. Por këto 15 vite Pavarësi të Kosovës kanë demonstruar në mënyrë shëmbullore e të sintetizuar vlerat më të mira e shumë shekullore të kombit shqiptar”, ka shkruar Begaj në Facebook.
Njëherit, Begaj ka vlerësuar edhe ecurinë e shkëlqyer të marrëdhënieve ndërshtetërore, derisa ka shtuar se Kosova e ka bërë rajonin më të paqtë dhe më të sigurt.
“Marrëdhënia mes Shqipërisë dhe Kosovës ëshë unikale për stabilitetin, sigurinë, zhvillimin e qëndrueshëm dhe perspektivën euroatlantike të të dy shteteve”, ka shkruar tutje Begaj. Kosova e Pavarur i ka dhënë jo vetëm shtetasve të saj dinjitetin e merituar dhe të shumëpritur shtetëror, por njëkohësisht e ka bërë rajonin tonë më të paqtë e të sigurtë, si dhe kombin shqiptar të lirë të rigjejë rrugën e munguar padrejtësisht të bashkëpunimit kombëtar”, thuhet tutje në postimin e tij.
Ndërkaq, të dy presidentët pritet të zhvillojnë një takim me dyer të mbyllura, ndërkohë që pasdite, Begaj do të pritet edhe nga kryeministri i Kosovës, Albin Kurti./teve1.info/.
