Sa i përket grafiteve “Wagner” në veri, eksperti i sigurisë, Fatmir Çollaku, vlerësoi se këto janë përpjekje të Serbisë për ta provokuar seriozisht situatën, e fillimisht qytetarët serbë atje.
Megjithatë, Çollaku tha se shërbimet inteligjente të Kosovës dhe miqve të saj, veçse janë në dijeni për prezencën e mercenarëve rusë në pjesë veriore.
“Realisht shërbimet inteligjente të Kosovës dhe të miqve tanë, e dinë dhe përkatësisht kanë të dhëna të verifikuara se prezenca e mercenarëve rusë, ka qenë në Kosovë dhe është në Kosovë. Tendencat e Serbisë për të provokuar seriozisht situatën përmes këtyre mercenarëve, përmes organizatës “Wagner”, e tërë kjo për të mbjellur frikë dhe pasiguri, fillimisht për qytetarët serbë atje”, deklaroi Çollaku në emisionin “Info Nata” në Tëvë1.
Njëherit, Çollaku konsideroi se nga organizata “Wagner”, gjithsesi do të sfidohet rendi juridik kushtetues i Republikës së Kosovës.
“Prandaj, natyrisht që masat dhe veprimet e Qeverisë së Kosovës përmes institucioneve ekzekutive, do duhej të jenë në nivel”, theksoi tutje Çollaku.
I pyetur se a ka rrezik që të rikthehen përsëri tensionet në veri, Çollaku vlerësoi se përshkallëzim të situatës nuk mund të ketë, mirëpo nuk përjashtoi mundësinë e provokimeve, organizimeve e protestave të dhunshme.
“Unë gjithmonë kam thënë që kategorikisht nuk do të ketë përshkallëzim të skajshëm, në kuptimin e luftës, sepse një gjë e tillë nuk është e dobishme as për faktorin ndërkombëtar, as për Serbinë e Kosovën”, potencoi Çollaku.
Kujtojmë se grafitet me mbishkrimin “Wagner” janë shfaqur në Mitrovicën e Veriut dhe në Zveçan.
Policia e Kosovës ka thënë se njësiti policor i hetimeve po merret me rastin, derisa i ka cilësuar si “Nxitje e urrejtjes dhe përçarjes ndëretnike”./teve1.info/.
