Asdren Shala nga Partia Socialdemokrate e Kosovës, në dyvjetorin fitores së Vetëvendosjes në Zgjedhjet Parlamentare vlerësoi se që nga ardhja në pushtet e Qeverisë Kurti 2 procesi i dialogut vetëm ka degraduar dhe ka pasur rezultate vetëm me punë të këqija.
Po ashtu, Shala vlerësoi se Kosova nuk ka qenë asnjëherë më keq në aspektin e diplomacisë, derisa e cilësoi si një Qeveri arrogante dhe të padijshme.
“Aksioni ynë simbolik sot para ndërtesës së Qeverisë, e ka pasur për qëllim ta përçojë tek qytetari mesazhin që qe 2 vite qeverisje nga Qeveria Kurti, realisht kemi pasur një Qeveria e cila përnjëmend, nuk ia ka bërë vijë. E që nënkupton, nuk e ka bërë as edhe një punë. Kemi pasur premtime të mëdha në elektorat, ose me thënë më ndryshe, kjo Qeveri ka bërë vetëm punë të këqija. Sa i përket procesit të dialogut, është një proces që tashmë e kemi parë të gjithë që ka degraduar në pikën më të ulët. Kosova si ka pasur kurrë punët më keq se sa tash, e kjo në aspektin e diplomacisë. Krejt këto janë pasojë e njeh keq qeverisje, pasojë e një qeverie arrogante, të padijshme, populiste dhe rrence”, deklaroi Shala në emisionin “Ditari” në Tëvë1.
Njëherit, Shala tha se nuk kanë pasur fare pritshmëri që Qeveria Kurti do të qeverisë.
“Kjo saktë i shkon për fytyre partive populiste që kur vijnë në pushtet, ose keq qeverisin, ose japin dorëheqje”, shtoi tutje Shala.
I pyetur se çka e konsideron dështimin më të madh të kësaj Qeverie, Shala vlerësoi se dështimin e tyre e pasqyron më së miri dialogu i Kosovës me Serbinë.
“Për mua shumë të rëndësishme janë çështjet ekonomike, e për të cilat kam thënë që bash asgjë nuk është bërë në këtë drejtim. Spitalet e vendit janë pa barna esenciale, ikja e mjekëve”, theksoi tutje ai.
Madje sipas tij, Kurti tani po mundohet t’ua lë fajin ndërkombëtarëve sa i përket dialogut me Serbinë.
“Çështja e dialogut është gënjeshtër. E dyta, forma se si po mundohet tani Qeveria Kurti t’ua plasojë qytetarëve të vendit që dialogu nuk është faji i tyre, por është presion ndërkombëtar. Prandaj, nga kjo vijnë tri probleme. Në radhë të parë, nëse është e vërtetë duhet t’u kërkojnë falje paraardhësve, sepse më herët i ka akuzuar që nuk bën të bijnë në presion ndërkombëtar, tani Kurti duhet të tregojë nëse është i shantazhuar, ose më e keqja nga kjo, është duke gënjyer”, tha më tej ai.
Derisa sot PSD ka mbajtur një aksion simbolik, aktivistë të këtij subjekti kanë ngjyrosur me ngjyrë të verdhë objektin e Qeverisë së Kosovës, duke nënkuptuar që pushteti “nuk ia ka bërë vijë” për dy vjet qeverisje./teve1.info/.