Vetëm edhe për disa muaj, Instituti i Mjekësisë Ligjore ka qese për kufoma.
E pas kësaj kohe, ky institut rrezikon të mbetet edhe pa materiale tjera mjekësore.
Për t’u furnizuar me materiale mjekësore për autopsi dhe ekzaminime klinike, Ministria e Drejtësisë kishe hapur edhe tender.
Mirëpo, ai u anulua në fillim të këtij muaj.
Kjo, sipas zëvendës drejtorit të IML-së, Ditor Haliti, kompania e vetme e cila ka aplikuar ka ofruar çmim më të lartë se sa është paraparë në tender.
“Arsyeja ka qenë se i vetmi ofertues i cili ka aplikuar në këtë tender nuk i ka plotësuar kushtet të cilat kërkohen sipas specifikave të tenderit. Në mungesë jemi për qese për kufoma për të cilat kemi materiale edhe për disa muaj, por nuk rrezikojmë që të shkojmë edhe më larg se disa muaj”, tha Haliti.
Por për të dalë kriza, IML i është drejtuar Ministrisë së Shëndetësisë.
“Tenderi është i nevojshëm pasi që disa nga furnizimet që është ky tender janë në rezerva. Ne akoma kemi mallra që janë të lidhur më këtë tender, por jo për një kohë të gjatë. Duke pasur parasysh që rishpallja e tenderit merr kohë, ne rrezikojmë që të mbesim pa material. Për këtë arsye iu kemi drejtuar Ministrisë së Shëndetësisë për ndihmë, e cila ka shprehur gatishmërinë për ndihmë”, shtoi ai.
Edhe në tenderin e anuluar jepet arsyeja e anulimit.
“Për arsye se vlera e parashikuar ka qene me vogël se oferta e pranuar dhe në mungesë te buxhetit anulohet ky tender”, thuhet në njoftim.
Nga IML thonë se rishpallja e tenderit pritet të bëhet brenda dy javëve.
Kronika e gazetares Doresa Geci.