Të Federata e Futbollit të Kosovës ende shpresojnë që Mërgim Berisha do të vendosë ta përfaqësojë Kosovën. Por sulmuesi 24-vjeçar në mendje ka plane të tjera. Berisha po ëndërron të luajë për Gjermaninë dhe madje të paraqitet në Kampionatin Evropian të vitit të ardhshëm.
Berisha është i lindur në Gjermani, por është me prejardhje nga Kosova. 24-vjeçari ka luajtur për U21 të Gjermanisë, ndërsa në 13 paraqitje ka realizuar një gol. Ai ende nuk ka luajtur për ndonjë përfaqësuese A dhe kjo ia jep mundësinë të zgjedhë mes Gjermanisë, Kosovës apo edhe Shqipërisë. Natyrisht nëse ftohet. Derisa Kosova ka kohë që e synon, Gjermania nuk e ka ftuar deri më tani. Dhe futbollisti i Augsburgut po e pret pikërisht Gjermaninë. Selektori i Gjermanisë, Hansi Flick, megjithatë nuk e ka kontaktuar ende Berishën.
“Nuk do të kisha asgjë kundër nëse duhet ta ndryshojmë datën. Por kjo mund të ndodhë në të ardhmen”.
Berisha ka gjashtë gola e katër asistime në 14 paraqitje në Bundesligë këtë edicion. Golat e fundit i ka festuar duke formuar shkronjën “E” me gishta. Ka treguar se është shkronja e parë e të fejuarës së tij dhe se festimi është për të. Berisha ka lënë të kuptohet se mund të qëndrojë më gjatë te skuadra e Bundesligës. Tek Augsburgu po ndihet si në shtëpi.
“Po ndiej besimin e trajnerit, përgjegjësve të klubit dhe bashkëlojtarëve. Po mundohem ta shpërblej këtë në mënyrën më të mirë të mundshme”.
Berisha ka shënuar tre gola këtë edicion për fitoret 1:0, pra ka siguruar të paktën nëntë pikë për skuadrën. Gola të tjerë të rëndësishëm shpreson të shënojë në ndeshjet e ardhshme.
Në Bundesligë janë edhe të paktën tre lojtarë që nuk kanë luajtur ende për përfaqësuese seniore dhe që do të ishin të mirëseardhur te Kosova. Por deri më tani ata nuk kanë shfaqur interes për të luajtur për Kosovën. Bëhet fjalë për mesfushorin e Augsburgut, Elvis Rexhbeçaj, portierin e Eintracht Frankfurtit, Diant Ramaj dhe mesfushorin ofenziv të Bayernit, Arijon Ibrahimoviq. Arijoni është ende 17-vjeçar dhe luan për të rinjtë e Gjermanisë. Fundjavën e kaluar debutoi në Bundesligë, derisa ardhmja e tij vlerësohet e ndritur.
