Kryeministri i Kosovës, Albin Kurti, ka thënë se takimi me presidentin serb, Aleksandar Vuçiq mund të ndodh vetëm në kontekstin e planit evropian.
Ai ka shtuar se ekziston një insistim ndërkombëtar që sipas tij, vjen nga frika e përhapjes së luftës nga Ukraina në Ballkan.
Sipas tij, kancelaritë perëndimore janë të shqetësuara që lufta mund të përhapet, dhe po mundohen që të arrihet sa më shpejt një marrëveshje mes Kosovës dhe Serbisë.
“18 gushti i vitit të kaluar është datë historike për dialogun mes Kosovës dhe Serbisë. Aty nisi dialogu për marrëveshje. Unë propozova një faqe me 6 kapituj se çfarë mund të përmbajë një marrëveshje. Tri javë më vonë, emisarët e special të BE-së, vijnë në zyrën time dhe sollën propozimin franko-gjerman. Unë kam pritur që të kemi takim të rregullta mujore, pse i kanë braktisur këto takime, unë nuk e di”, ka thënë ai.
Sipas tij ai që në fillim ka thënë se plani evropian është bazë e mirë për dialogun.
Kurti ka thënë se janë në pritje të një takimi të nivelit të lartë.
“Le ta diskutojmë çështjen e propozimit evropian. Unë shpresoj që sa më shpejt të kemi marrëveshje. Unë jam optimist për shkak se është shtuar insistimi ndërkombëtarë, por në të njëjtën kohë edhe në Beograd e kanë kuptuar se nuk mund të merren vesh me mua në dëm të Kosovës”, ka thënë ai për Euronewsalbania.
