Kryetari i Lidhjes Demokratike të Kosovës, Lumir Abdixhiku, deklaroi se që nga momenti kur kryeministri Albin Kurti ka ardhur në pushtet, inflacioni është rritur për 11.6 përqind.
Derisa përmendi disa produkte bazike të cilave u është rritur çmimi, Abdixhiku kërkoi që të formohet një koeficient i ri.
“Prej ditës së parë që është ulur aty kryeministri Kurti, është rritur inflacioni 11.6 përqind, sepse nuk e kupton dallimin bazik në ekonomi nga inflacioni periodik. Ai inflacion është 20 përqind sipas Agjencisë së Statistikave të Kosovës. Kriza për ministrin dhe gjithë të tjerët, është kur vezët në Kosovë kushtojnë nga 2 euro e 71 cent në 4 e 25 cent. Buka nga 35 cent në 51 cent. Qumështi nga 0.88 cent në 1.25 cent. Vaji nga 1.21 cent në 2.19 cent. Mielli nga 0.51 cent në 0.83 cent. A e din çka është kriza ministër? Kur çmimet nën mesatare rriten për 20 përqind e për produktet bazike të familjeve kosovare u janë rritur 50 përqind. Kjo është krizë. Krizë e shkaktuar nga rritja e çmimeve. Pra, nuk është 11 përqind, por as këtë nuk e dini. Prandaj, propozimi ynë është për koeficient të ri”, deklaroi Abdixhiku para deputetëve.
Ndërkaq, drejtuar ministrit të Financave, Hekuran Muratit, Abdixhiku tha se nuk ka menduar ndonjëherë që Murati do e lë jetën akademike për të mbajtur ligjërata në Kuvend./teve1.info/.