Ministri i Shëndetësisë, Arben Vitia, ka takuar kryetarin e Komunës së Shtimes, Qemajl Aliu, me të cilin kanë diskutuar për investime në këtë komunë, raporton teve1.info
Përmes një komunikate për medie, Ministria e Shëndetësisë ka njoftuar se në Komunën e Shtimes ka planifikuar ndërtimin e Qendrës Kryesore të Mjekësisë Familjare, për çka është ndarë buxheti prej 1 milion e 250 mijë euro, si dhe ndërtimi i Entit Special në këtë komunë për të cilin janë ndarë 4 milionë euro.
Gjatë takimit me kryetarin e Komunës së Shtimes, z. Qemajl Aliu dhe kabinetin e tij, ministri Vitia tha se përveç planifikimit për ndërtimin e projekteve kapitale, mbetet i përkushtuar për përmirësimin e shërbimeve shëndetësore për qytetarët e Komunës së Shtimes.
“Ishte kënaqësi takimi me kryetarin Aliu. Me projektet e reja të cilat u prezantuan nga kryetari dhe drejtori i shëndetësisë, është tregues se në shëndetësi qytetarët e Shtimes në të ardhmen do të kenë shërbime shumë më cilësore. Sot biseduam edhe për dy projekte me rëndësi, siç janë ndërtimi i Entit Special dhe i QKMF-së në këtë komunë, projekte të cilat do të jenë në fokusin tonë dhe prioritete si Ministri e Shëndetësisë”, tha ministri Vitia.
Ndërsa kryetari i Komunës së Shtimes tha se është lajm shumë i mirë që vëmendja e pushtetit qendror është kthyer kah Komuna e Shtimes e cila, siq tha ai, ka qenë e diskriminuar sa i përket investimeve në sektorin e shëndetësisë.
