Në një postim në Facebook, Bislimi ka bërë të ditur se në këtë takim u ritheksua se Evropa duhet të jetë e bashkuar jo vetëm në çështjen e Ukrainës, por edhe në çështjet e tjera të cilat ndërlidhen me Ballkanin Perëndimor.
“Gjatë takimit me Zëvendës Sekretarin e Këshillit të Evropës, Bjorn Berge, u ritheksua se Evropa duhet të jetë e bashkuar jo vetëm në çështjen e Ukrainës, por edhe në çështjet e tjera të cilat ndërlidhen me Ballkanin Perëndimor. Diskutuam mbi aplikimin e Kosovës për marrjen e statusit të vendit kandidat për integrim në Bashkimin Evropian, ku u theksua se progresi i Kosovës në reformat e rekomandimet e BE ka vijuar me rezultate pozitive”, ka shkruar Bislimi.
“Gjithashtu u riafirmua rëndësia që bashkëpunimi i Kosovës dhe Këshillit të Evropës të vazhdojë intensivisht si pjesë e Komisionit të Venedikut, Bankës së Këshillit të Evropës, Kuvendit dhe Komunave si dhe të punohet maksimalisht për përkrahje dhe mbështetje të vazhdueshme në vijimin e progresit në reformat kyçe dhe prioritare në kuadër të ERA II si dhe përkushtimi në vlerat dhe politikat e Bashkimit Evropian”, ka shkruar zëvndëskryeministri Bislimi në Facebook. /Teve1.info/
