Së fundmi ministri serb, Nikola Selakoviq, e ka quajtur masakrën e Reçakut një trillim.
Sipas Selakoviq, ushtria serbe ka vepruar në mënyrë legjitime duke luftuar kundër formacioneve terroriste në Kosovë, pavarësisht se faktet tregojnë që në fshatin Reçak u masakruan barbarisht 45 civilë shqiptarë.
Kjo mizori nxiti edhe reagimin e aleancës më të fuqishme ushtarake në botë, NATO-s.
Megjithatë shteti serb edhe pas 24 viteve po e mohon realitetin.
Bekim Blakaj nga fondi për të drejtën humanitare thotë se shteti serb akoma nuk po ballafaqohet me të kaluarën.
Blakaj tregon se deri më tani asnjë serb nuk është dënuar për masakrën e Reçakut.
Në anën tjetër, Profesor i së Drejtës Penale, Ismet Salihu, konsideron që drejtësia ndërkombëtare ka dështuar në ndëshkimin e atyre që kanë kryer krime ne Reçak.
Ndërkaq, ish-ambasadori i OSBE-së, William Walker, ka deklaruar se përpjekja e disa zyrtarëve në Serbi për ta prezantuar masakrën e Reçakut si një ngjarje të trilluar është bërë për shkak se disa prej tyre kanë qenë të përfshirë në krime kundër popullatës civile në Kosovë.
Kronika e gazetarit Shpat Blakçori.
