“Janë ato pamje të transmetuara nga mediat botërore, të shfaqura përsëri, duke u rikthyer ndër imazhet përmes të cilave më së shumti na njohu bota demokratike, na njohu si vend i viktimës ku Serbia kreu gjenocid”, ka thënë Kurti në ceremoninë përkujtimore të kësaj masakre.
“Sa herë që vijmë për vizitë dhe homazhe, përballë faqes të murit që përmban emrat e viktimave, pashmangshëm na rikthehen në kujtesë pamjet e trupave të tyre të masakruara më 15 janar nga policia dhe forcat e Serbisë në përgjithësi”.
Këtë masakër e quajti argumentin më të rëndësishëm për intervenimin e bashkësisë ndërkombëtare.
“Kjo masakër e Reçakut, ndonëse është një ndër ato mbi 400 maskrat, megjitahtë është krimi i luftës që më së shumti i ka nxitë ndryshimet e qëndrimeve të shteteve më të fuqishme të bashkësisë ndërkombëtare, në raport me atë se çfarë po bënte Serbia në Kosovë. E vëzhguar nga misioni i OSBE ajo u shndërrua në një nga argumentet më të fuqishme dhe të pakontestueshme për ndërhyrjen e NATO-s e cila do të vinte pas dy muajsh”, ka deklaruar Kurti.
Meritat për këtë ai ia dedikoi ambasadorit William Walker.
“Për këtë merita të veçanta i takojnë ambasadorit amerikan që kryesonte misionin verifikues të OSBE, diplomatit William Walker. Pasi pa trupat e 45 personave të masakruar, Walker pati kurajën ta përshkruante atë që ishte në të vërtetë – masakër dhe krim kundër njerëzimit. Ai kështu i dha vetes së tij në rol të rëndësishëm në historinë e Kosovës”.
“Në një kohë kur kishte pak zëra që flisnin qartë dhe fuqishëm për Kosovën në diskursin ndërkombëtar, ai e tha të vërtetën për krimet e luftës, duke folur jo thjesht për gjuhë diplomatike por sidomos me gjuhën e një humanisti të kulluar”, deklaroi Kurti.
