Në “Info Nata” në Tëvë 1, Agani theksoi se shpreson që ministri Vitia do ta kuptoj se e vetmja zgjidhje për sektorin e Shëndetësisë është vazhdimi i reformës të filluar në vitin 2013-2014.
“Unë mendoj që Vitia e ka rastin, e ka shansin. Kësaj here e ka shansën që me qenë i suksesshëm edhe si ministër. Unë po uroj që ai në këtë periudhë kohore ku ka ec nëpër disa segmente të institucioneve të vendit deri në fund edhe sektorin privat, e ka pa pak shëndetësinë edhe nga një kënd tjetër. Dhe po shpresoj që do ta kuptoj që e vetmja zgjidhje për sektorin e shëndetësisë në vend, e them me përgjegjësi të plotë, është vazhdimi i reformës të filluar në vitin 2013-2014”, deklaroi ai.
Ish-ministri shtoi se qytetarët e vendit po ballafaqohen me vështirësi të jashtëzakonshme në këtë sektor.
Arben Vitia është rikthyer në pozitën e ministrit të Shëndetësisë më 26 dhjetor. Vitia që mbante këtë pozitë në Qeverinë Kurti u largua pasi kandidoi për kryetar të Prishtinës. Kosova nuk ka pasur ministër të Shëndetësisë që nga 6 tetori i këtij viti, që prej largimit të Rifat Latifit nga kjo detyrë. /Teve1.info/
