Sipas njoftimit të Policisë së Kosovës, për shkak të këtij intervenimi, përgjatë dy orëve do të mbyllet njëra korsi e kësaj rruge derisa në mesditë do të mbyllet komplet rruga, deri në largimin e mjeteve të rënda.
“Policia e Kosovës përmes këtij njoftimi zyrtar bën të ditur se sot njësitet e KFOR-it do të largojnë mjetet e rënda (kamionët) e dëmtuar, të cilët kanë qenë të vendosur në lokacionin e quajtur “Përroi i Zhazhës”.
Për shkaqe pune dhe sigurie, nga mëngjesi një korsi e rrugës mbyllet për qarkullim, përderisa në mesditë përreth dy orë do të mbyllet komplet rruga për qarkullim në drejtimin Mitrovicë – Jarinje, deri sa të largohen mjetet e rënda, për t’u mundësuar qarkullimin dhe lëvizjen e lirë të mjeteve dhe qytetarëve.
Përgjatë kësaj kohe njësitet policore do të asistojnë KFOR-in, si dhe do të ri-orientojnë trafikun”, thuhet në njoftimin e Policisë.
Kamionët që pritet të largohen ishin vendosur si barrikadë nga serbët veriorë të Mitrovicës, javë më parë.
