Ajo ka thënë se sezoni i festave është gjithmonë një periudhë reflektimi dhe me këtë rast ajo u shpreh krenare me qytetarët e Kosovës, pasi ka thënë se ata e kanë dëshmuar se jemi një popull shpresëplotë.
“Përderisa reflektojmë mbi vitin që po e lëmë pas, nuk do të mund të isha më krenare për njerëzit e vendit tonë. Pavarësisht sfidave që na kanë përcjellur ndër dekada ne kemi dëshmuar se jemi një popull shpresëplotë e i përkushtuar për ditë më të mira”, është shprehur Osmani në adresimin e saj drejtuar qytetarëve për Vitin e Ri 2023, përcjell teve1.info.
Më tej, e para e shtetit ka ka falënderuar profesionistët e gjitha fushave për angazhimin e tyre.
Sipas Osmanit këtë vit Kosova ka shënuar arritje e suksese të shumta, por ka thënë se duhet të angazhim edhe më i madh për arritjen e synimeve të përbashkëta.
“Besoj fort se përpara kemi një të ardhme premtuese e ditë më të mira, sepse vullneti, qëndresa dhe vizioni i qytetarëve tanë është testuar e dëshmuar sfidë pas sfide e vit pas viti. Uroj që ky vit i ri të jetë vit i shpresës, por mbi të gjitha të jetë një vit i veprimit, ku do të veprojmë bindshëm e me përkushtim në çdo drejtim për të arritur synimet tona të përbashkëta, për ta avancuar gjithnjë e më shumë demokracinë dhe ekonominë tonë e për të konsoliduar gjithnjë e më shumë prezencën dhe imazhin tonë në çdo cep të botës. Gëzuar Vitin e Ri 2023!”, ka deklaruar Osmani.
Presidentja e Kosovës, po ashtu ka bërë thirrje që të luftohet femicidi. Në një videoadresim të dërguar të shtunën për media, Osmani ka thënë se kjo çështje duhet të trajtohet si emergjencë kombëtare.
“Sot s’mund të mos flas edhe për dhimbjen e përjetuar e të mos përmend ata që s’janë më në mesin tonë. Dua të kujtoj gratë e vajzat që u bënë viktimë e femicidit, fenomenit të tmerrshëm që duhet ta luftojmë të gjithë së bashku. Keqtrajtimi i grave në shoqërinë tonë e mbarë botën po shndërrohet në epidemi. Prandaj duhet ta trajtojmë si emergjencë kombëtare. Në këtë përpjekje kemi nevojë për angazhimin e të gjithëve, politikanëve, institucioneve të drejtësisë, sigurisë, punëtorëve socialë, aktivistëve të shoqërisë civile e mediave. Duhet të shndërrohet në kauzën tonë të përbashkët. Lufta për barazi gjinore duhet të jetë lufta jonë e çdoditshme”, ka thënë Osmani në adresimin e saj.
/teve1.info/.
