Lajmin e ka publikuar Policia e Kosovës, duke i njoftuar qytetarët se kjo pikë kufitare është e lirë për qarkullim.
“Bazuar në informacionet e fundit, rruga e cila ishte bllokuar me 27.12.2022 në kilometrin e dytë brenda në Serbi, sot në ora 09:50 është liruar për qarkullim.
Andaj, njoftojmë qytetarët dhe bashkatdhetarët se tani pikë kalimi kufitar “Merdare”, është liruar për qarkullim dhe i është kthyer normalitetit të plotë”, thuhet në njoftimin e Policisë.
Ndërkohë, gazetarët e teve1 në terren bëjnë të ditur se kamionët që ishin vendosur në barrikadë në këtë pikë kufitare, janë nisur për në Serbi.
Pika kufitare në Merdarë ishte mbyllur dy ditë më parë pasi ishte bllokuar rruga brenda Serbisë që e lidhë këtë pikë kufitare me Kosovën.
