Sipas Jasharit, Gjykata Themelore dhe Prokuroria nuk mund të fajësohen për situatën e krijuar në veri, pasi sipas tij, fajtor në këtë mes është vetëm politika.
“Lirimi i Dejan Pantiqit, natyrisht që është nja lajm shumë i keq për drejtësinë, sepse mund të humbë mundësia të gjykohet. Pantiq mund të ikë, sepse kush do e mbikëqyrë atë?, pasi ai në ambientin dhe në rrethin e vet pritet si hero. Përfundimisht mund të them që as Gjykata as Prokuroria nuk janë fajtore për gjendjen që është në veri, fajtore është politika. Nëse Gjykata me të vërtetë ka marrë një vendim për zëvendësimin e masës së paraburgimit me arrest shtëpiak, atëherë çdo minutë i mbajtjes së tij në paraburgim është i paligjshëm dhe për këtë dikush mund të marrë përgjegjësi”, deklaroi Jashari në emisionin “Ditari”.
Njëherit, Jashari tha se policia nuk është e detyruar ta mbikëqyrë Pantiqin 24 orë, por herë pas herë mund vetëm ta verifikojnë nëse ai ndodhet në lokacionin e tij.
I pyetur për vendimin e Gjykatës Themelore, pasi ia shqiptuan Pantiqit masën e paraburgimit më 12 dhjetor të këtij muaji, Jashari tha se Prokuroria në çdo kohë mund të kërkojë ndërprerjen e masës së paraburgimit.
“Pra, proceduralisht është gjithçka normale. Në rast se Prokuroria kërkon një masë më të lehtë, Gjykata është e lidhur të veprojë sipas kërkesës së Prokurorisë”, theksoi tutje Jashari./teve1.info/.
