Përmes një njoftimi për media nga Institucioni i Avokatit të Popullit, thuhet se gjatë intervistimit, Pantiqi nuk ka pasur ndonjë ankesë sa i përket trajtimit nga Policia e Kosovës, shkruan Teve1.info
“Pantiç është arrestuar nga Policia e Kosovës në pikën kufitare në Jarinje, ku edhe po mbahet në paraburgim me vendim të gjykatës, në pamundësi për tu transferuar në ndonjë qendër të paraburgimit për shkak të situatës së krijuar. Gjatë intervistimit, z. Pantiç tha se nuk ka ndonjë ankesë sa i përket trajtimit nga Policia e Kosovës. Ai ka avokat mbrojtës dhe e ka realizuar një takim online me të, ndërsa më 22 dhjetor 2022 ata kanë biseduar përmes telefonit. Familja është njoftuar për faktin se ai u arrestua dhe iu shqiptua masa e paraburgimit”, thuhet në njoftim.
Sipas Avokatit të Popullit, Pantiqi ka kërkuar që t’i lejohet vizita nga avokati mbrojtës dhe familja. Kërkesë tjetër e tij është edhe që të akomodohet në Qendrën e Paraburgimit në Mitrovicë dhe jo diku tjetër.
“Deri më tani nuk ka realizuar takim me ta, pasi që takimet dhe telefonatat janë subjekt i lejes nga gjykata kompetente. Sa i përket gjendjes shëndetësore, ai tha se vuan nga tensioni, por është duke e marrë terapinë adekuate. Ai po ashtu po i përdorë medikamentet që i kishin sjellë familja e tij. Ai theksoi se atij iu sigurua edhe shtrati për të fjetur dhe se i është dorëzuar vendimi gjyqësor për caktimin e masës së paraburgimit. Ai ka kërkuar që ti lejohet vizita nga avokati mbrojtës dhe familja, dhe që të akomodohet në Qendrën e Paraburgimit në Mitrovicë dhe jo në ndonjë qendër tjetër”, thuhet më tej në njoftim.
Avokati i Popullit ka qartësuar se ka qenë e pamundur që të takoheshin me Pantiqin fizikisht për shkak të barrikadave, teksa ka kërkuar nga organet kompetente që të bëjnë maksimumin që Pantiq të tajtohet në pajtim me legjislacionin.
“Avokati i Popullit falënderon Policinë e Kosovës për mundësimin e këtij kontakti edhe përkundër kushteve të jashtëzakonshme në të cilat po punojnë. Avokati i Popullit kërkon nga të gjitha organet kompetente që të bëjnë maksimumin e tyre që z. Pantiç të trajtohet në pajtim me legjislacionin duke respektuar të gjitha të drejtat që i takojnë”, është bërë e ditur në komunikatë. /Teve1.info/