Sipas një komunikate për medie nga Prokuroria e Shtetit, këto deklarime u bënë gjatë takimit në mes të koordinatorëve për veprat penale kundër dhunës në familje nga të gjitha prokuroritë themelore të Republikës së Kosovës, me ftesë të koordinatores, Sevdije Morina.
“Në këtë takim u diskutua për problemet dhe sfidat kryesore me të cilat ballafaqohen prokurorët e shtetit në trajtimin e rasteve që kanë të bëjnë me veprat penale kundër dhunës në familje.
Ndër të tjera u diskutua për sigurimin e provave të mjaftueshme, tërheqjen e deklaratave të viktimave në shqyrtim dhe për pamundësinë ligjore për tu mbështetur në deklaratat e mëhershme.
Po ashtu, gjatë këtij takimi u diskutua edhe për mungesën e kapaciteteve në Institutin e psikiatrisë forenzike dhe zvarritjen e ekspertizave”, thuhet në komunikatë.
Në këtë takim, ku të pranishëm ishin edhe përfaqësues nga Ambasada Amerikane në Prishtinë të gjithë prokurorët koordinatorë u zotuan që do të vazhdojnë me përkushtim edhe më të madh, me urgjencë dhe me efikasitet të trajtojnë të gjitha rastet që ndërlidhen me veprat penale kundër dhunës në familje, njofton Prokuroria.