Ishte data 10 dhjetor, kur serbët vendosën barrikada në rrugët që çojnë në dy pikat kufitare: në Jarinje dhe Bërnjak.
Policët dhe doganierët që ishin në atë ditë në ndërrim, u bllokuan në këto dy pika kufitare.
Që nga ajo ditë, shteti ynë nuk ka arritur që t’i tërheq ata nga stacioni policor në Leposaviq dhe pika kufitare në Jarinje.
E situata e tyre po vazhdon që të rëndohet.
Tëvë1 ka arritur që të komunikojë me disa nga policët që gjenden atje. Të njëjtit janë shprehur të shqetësuar për situatën në të cilën gjenden.
Se jeta e tyre është në rrezik, po e thonë edhe nga Sindikata e Policisë së Kosovës.
“Duhet të kuptojmë se edhe durimi e ka fundin e vet edhe për ata që janë atje edhe për ne. Në këtë rast është tejkaluar gjithçka nga normalja sepse kemi të bëjmë me rrezikun e jetës nga sëmundje të ndryshme të zyrtarëve policorë dhe qytetarëve që banojnë në atë pjesë, tani më kemi të bëjmë me krizë humanitare, prandaj duhet të intervenohet urgjentisht”, thuhet në qëndrimin e SPK-së.
Mungesa e ushqimit dhe fjetja në kushte të rënda, janë dy nga vështirësitë më të mëdha që po përballen këta zyrtarë shtetëror tani e 11 ditë.
Ish-drejtori i Policisë së Kosovës, po shprehet i shqetësuar me situatën me të cilën po përballen ata.
Përveç vendosjes së nëntë barrikadave të cilat e kanë bllokuar veriun, grupet të cilat shteti i cilëson kriminale, plagosën një pjestar të Policisë së Kosovës.
Në anën tjetër, shumë shpërthime me shok-bomba ndodhën në 11 ditët e fundit në pjesë të ndryshme të katër komunave veriore.
Kronika e gazetarit Arton Rama.
