Messi u shpall Kampion i Botës me Argjentinën teksa trumfuan në finalen e madhe ndaj Francës. U deshën goditjet e penalltive për të gjetur fituesin në një sfidë që dhuroi emocione dhe gola me shumicë teksa 90-minutat përfunduan në barazim 2-2 teksa në kohën shtesë shifrat shkuan në 3-3.
Gjithsesi, ankthi në fund ia vlejti për Messin që me trofeun e Kupës së Botës në duar, tashmë mund të konsiderohet si më i madhi në historinë e futbollit. Së fundmi, komplimentat në drejtim të 35-vjeçarit mbërrijnë edhe nga Brazili, aty ku Ronaldo Fenomeni thekson se Messi krijoi një epokë të re.
“Futbolli i Messit bën që të hedhësh pas krahëve të gjithë rivalitetin e mundshëm, edhe atë më historikun mes Brazilit dhe Argjentinës. Kam parë shumë brazilianë, po ashtu edhe njerëz nga e gjithë që u shndërruan në tifozë të Messit këtë Botëror. Një lamtumirë e denjë për një gjeni që është më shumë se një yll botëror, ai është lider i një epoke të re”, shkruan Ronaldo në rrjetet sociale.