Ka muaj që 11 prej këtyre foshnjave jetojnë në katin e fundit të spitalit rajonal në Kherson në një dhomë të errët.
Për ta përkujdesen stafi i cili për të njëmbëdhjetët shpikën sëmundje, vetëm e vetëm që të mos i kthenin ata në jetimore e të mos përfundonin në duart e rusëve, ashtu si ndodhi me fëmijët e tjerë nëpër jetimoret e Khersonit.
Olga Pilyarska, drejtuese e kujdesit intensiv në këtë spital thotë se ishte vendim i drejtë mbajtja e fëmijëve, pasi jetimorja ku ata ishin, tashmë është evakuuar tërësisht.
“Ne kishim frikë të transferonim fëmijët në jetimore dhe po mbanim të gjithë jetimët me ne. Ata që ishin këtu për trajtim qëndruan me ne. Ishte një vendim i drejtë sepse jetimorja u evakuua dhe këta jetimë (që ishin në spital) qëndruan këtu. Ata ishin shumë të rreptë në lidhje me regjistrimin e certifikatës së lindjes. Kishte pyetje shumë serioze, me sa duket ata kanë nevojë për fëmijë”, Olga Pilyarska – drejtuese e kujdesit intensiv të Spitalit të Fëmijëve Kherson.
Autoritetet lokale thonë se të paktën 1 mijë fëmijë u morën nga shkollat dhe jetimoret në rajonin Kherson gjatë pushtimit tetë-mujor të zonës nga Rusia, ndërsa ende nuk dihet vendndodhja e tyre.
“Nuk ka mbetur asnjë fëmijë në asnjë jetimore në Kherson, të gjithë i kanë marrë pushtuesit. Nuk dimë fatin e këtyre fëmijëve dhe as fatin e fëmijëve që janë nxjerrë nga institucionet arsimore të qytetit tonë. Diku deri në 1000 fëmijë u morën. Kjo është e sigurt”, Galina Lugova – kreu i administratës ushtarake të Khersonit.
Banorët thonë se edhe më shumë fëmijë do të ishin zhdukur nëse nuk do të ishin përpjekjet e disave në komunitet që rrezikuan jetën e tyre për të fshehur sa më shumë fëmijë.
Në fillim të këtij viti, Associated Press raportoi se Rusia po përpiqet t’u japë mijëra fëmijë ukrainas familjeve ruse për kujdestari ose birësim.
Sipas këtij mediumi ndërkombëtar, zyrtarët kanë deportuar fëmijë ukrainas në Rusi ose në territoret e kontrolluara nga Rusia pa pëlqim, i kanë gënjyer se nuk ishin të kërkuar nga prindërit e tyre, i kanë përdorur për propagandë dhe ua kanë dhënë familjeve e poashtu edhe shtetësi ruse./teve1.info/
