Një ngjarje e rëndë, por edhe e hidhur për futbollin kosovarë ka ndodhur këtë të shtunë. Një lojtar junior i Trepçës ’89 ka vdekur në fushën e lojës të shtunën, në ndeshjen kundër A&N në Korishë të Prizrenit.
Talenti i madh i futbollit kosovar, Erion Kajtazi ka qenë duke luajtur në ndeshjen A&N – Trepça’89, në kuadër të Superligës në kategorinë e juniorëve, kur në një moment ka rënë pa vetëdije në fushë.
Stafet mjekësore të të dyja klubeve kanë intervenuar me shpejtësi për t’i ofruar ndihmë dhe më pas me urgjencë e kanë dërguar në Spitalin Rajonal në Prizren.
Megjithatë, përkundër përpjekjeve maksimale të mjekëve, Erioni nuk ka dhënë shenja jete dhe është konstatuar vdekja e tij nga ataku kardiak.
