Nuk dihet me siguri nëse presidenti serb Aleksandër Vuçiq do të marr pjesë në diskutim, pasi edhe këtë herë ka gjetur një arsyetim, që po konsiderohet edhe si banal.
Ai thotë se është i shqetësuar që Albin Kurti, emëroi Nenad Rashiqin për ministër.
Profesori universitar Milazim Krasniqi thotë se edhe nëse Vuciq shkon në Tiranë, nuk mundëson zgjidhjen e ndonjë problemi.
“Deklaratat e fundit të presidentit të Serbisë Vuciq janë që po e shqyrton ose rishqyrton mundësinë që të shkoj në Tiranë, me sugjerimin e kryeministres së vendit të vet, pas takimit me Vrahelin duket sikur i ka modifikuar pak qëndrimet. Prezenca e tij sigurisht që e kompleton në pikëpamje formale, numrin e shteteve të Ballkanit, por nuk zgjidh asnjë problem”,ka thënë Krasniqi.
Por, opinonisti Ben Andoni, thotë se përfitimi i vetëm që rajoni mund të marr nga ky samit është, presioni që vendet e BE-së do të bëjnë mbi Serbinë, për sanksione ndaj Rusisë.
Njohësi i çështjeve politike Agron Hoti, thotë se mbajtja e këtij Samit në Shqipëri do të sjellë benefite për të gjithë rajonin.
“Është një ngjarje që organizohet për herë të parë në Shqipëri, d.m.th është një diçka e jashtëzakonshme, është një faktorizim i Shqipërisë, sigurisht që përfitimet janë jo vetëm të Shqipërisë, por të gjithë rajonit sa i përket procesit të integrimit Evropian… Benefitet e Kosovës do të jenë afatgjata, sepse edhe Kosova do të jetë pjesë e barabartë e kësaj ngjarje e këtij samiti dhe kjo nuk është pak për Kosovën duke pasur parasysh pengesat që i kemi nga Serbia”, ka thënë Hoti.
Të martën liderët do të diskutojnë për pasojat e agresionit rus në Ukrainë, bashkëpunimi në fushën e politikës dhe sigurisë, kundër ndërhyrjeve të huaja, si dhe trajtim i problematikave tjera, si migrimi, krimi i organizuar, terrorizim etj.
Kronika e realizuar nga Valmir Gallopeni
