Në debatin parlamentar për shëndetësinë në Kuvendin e Kosovës, Zemaj tha se si pasojë e keqmenaxhimit në shëndetësi lista e pritjes për koronarografi në QKUK është 1 mijë e 700 pacientë.
“Mungea e barërave dhe materialit shpenzues është bërë e zakonshme për qytetarët e Kosovës. 50 për qind është furnizim me barëra në shumicën e komunave kurse me material shpenzues është nën 70 për qind. Lista e gjatë e pritjes, keqmenaxhimi, mungesa e barërave dhe materialit shpenzues kanë bërë që 1 mijë e 700 pacientë të presin në radhë për një koronarografi”, tha Zemaj.
Sipas tij, nga keqmenaxhimim është ndërprerë puna 24 orëshe e CT- në Neurologji.
“Qytetarët po privohen nga shërbimet shëndetësore. Duke u përballur me këto fakte as propaganda e partisë në pushtet nuk mjafton që t’i largon problemet e qytetarëve me të cilat po ballafaqohen”, tha Zemaj.
Zemaj tha se një ministër ishte larguar nga puna në pikun e vdekjeve nga Covid19 derisa tjetri u largua në krizën më të madhe të këtij sektori.
