Mirëpo, në këto anë, ndryshe nga zakonisht, janë shtuar flamujt në rrugë dhe banesat e serbëve lokalë.
Po ashtu janë shtuar edhe grafitet me mesazhe nacionaliste.
Pavarësisht që javët e fundit janë shtuar simbolet shtetërore të Republikës së Kosovës edhe në sheshin “Car Lazari” në Mitrovicën Veriore, gjatë së mërkurës situata ka qenë e qetë.
Ndërkohë, të qetë janë edhe qytetarët, të cilët thonë se nuk po shohin rrezik.
“Nuk e kam idenë se çfarë do të bëjmë, si do të sillemi apo si do të regjistrohemi, mirëpo nuk ndihem e rrezikuar, nuk ka arsye për këtë”, tha një qytetare.
“Jo nuk ndihem e rrezikuar. Unë nuk vozis, vozitë mbesa ime … unë nuk vozis veturë, jam këmbësore”, u shpreh një qytetare tjetër.
Në anën tjetër, politikani që njihet për qëndrime kundër Listës Serbe, i bën thirrje Qeverisë së Kosovës që ta tërheqë vendimin për targa, pasi vlerëson se situata pas 21 nëntorit do të eskalojë.
“Na pret një periudhë jashtëzakonisht e vështirë ngase në këtë gjendje kaotike që e kemi sot, nuk përjashtohet mundësia e veprimeve të papërgjegjshme të individëve e mund ta them edhe nxitjen e ndonjë konflikti mes qytetarëve. Nëse vazhdohet me këtë vendim, gjendja pas datës 21 mund të eskalojë dhe e kisha porositur Qeverinë e Kosovës që urgjentisht dhe pa vonesa ta tërheqë vendimin që ka marrë”, deklaroi Aleksandar Arsinijeviç nga iniciativa “Mbijetesa Serbe”.
Ndryshe, Qeverisë Kurti po i kërkohet edhe nga BE-ja dhe SHBA-ja që të shtyjë vendimin për targat si dhe të nisë themelimit e Asociacionit të komunave serbe.
Kronika e gazetares Fetije Kamberi.
